O BNG repara a sabotaxe a unha placa en memoria dos represaliados

Traducción Estación Atlántica

ARCADIO SILVOSA - El País - Lugo - 22/01/2011

O Vicedo, en concreto a praia da Abrela, foi un dos portos crave de fuxida cara ao exilio francés durante a Guerra Civil e a posguerra. Cando a guerrilla antifranquista desta zona da costa de Lugo e a comarca anexa de Ferrol apenas podían continuar co seu labor de resistencia, escapaban polo lugar. Así, en 1946 puxeron rumbo a Baiona a bordo do barco Santa Teresa. Aos últimos guerrilleiros rendéuselles homenaxe o ano pasado e quíxose perpetuar a súa memoria coa colocación dunha simbólica placa no miradoiro de San Román do Val. Pero durou moi pouco. Xusto o tempo que tardaron os abanderados da intolerancia en destruíla.

Os nacionalistas repetirán hoxe a homenaxe e reporán a placa que recorda, entre outros, a Antonio Paleo, O Chicharro, O Manchego, ou os cataláns Evaristo Candelas, O Evaristo, e Antonio Molíns, O Noi, ademais dos integrantes do Grupo Ferrol. En total, menos dunha vintena de guerrilleiros cuxo nome volverá figurar na placa. Os nacionalistas interpretan o acontecemento como "un acto de desagravio para todos aqueles que loitaron pola democracia", ademais dun exercicio "contra a desmemoria desde a consideración de que non pode haber reconciliación desde o esquecemento".

"Herdeiros do 36"

A portavoz local do BNG, Susana Riveira, e o responsable comarcal nacionalista, Antonio Veiga, coinciden en afirmar que o acto de hoxe ten unha consideración especial "pola agresión da que volveron ser vítimas os represaliados do Vicedo coa destrución da placa colocada en agosto do ano pasado, e que demostra que a mesma intolerancia que caracterizou aos reaccionarios que provocaron a masacre de 1936 segue presente nos seus herdeiros ideolóxicos". Xa en agosto, a concelleira considerara o acto vandálico "unha falta de respecto á memoria dos veciños do Vicedo que foron vítimas do franquismo e unha ofensa aos familiares daquelas persoas que participaron masivamente no acto".

Por este motivo, o BNG convocou a todos os veciños de A Mariña para que participen nesta homenaxe. "Trátase dunha actividade de rescate da memoria histórica", engade a organización, e un acto para unha Galicia "máis libre e socialmente máis xusta".