Retiradas de Ribeira as placas das avenidas General Franco e Primo de Rivera

Foto: gerpe

Tras obter o permiso dos donos, operarios contratados polo Concello procederon esta mañá á retirada de ambos os mosaicos

A Voz de Galicia - A.G. 12 de xuño de 2014

As placas cos nomes General Franco e Primo de Rivera que aínda lucían dúas casas antigas do centro urbano de Ribeira xa son historia. Tras obter o permiso dos donos, operarios contratados polo Concello procederon esta mañá á retirada de ambos os mosaicos. As tarefas prolongáronse varias horas porque as placas estaban incrustadas nas paredes de ambas vivendas. No seu lugar colocáronse outras coa mesma estética, que foron encargadas polo Concello a petición dos propietarios das casas. Trátase duns mosaicos pintados e decorados con flores. A actuación realizouse a instancias dunha solicitude formulada pola Comisión pola Memoria Histórica.