A cruz de Franco celebra o seu 53 aniversario grazas a Caballero

NOT N 977 B

O NON-DO recorda a inauguración no Castro en setembro de 1961

             

Diego Pérez - Vigo / A Voz  15 de setembro de 2014

Un alcalde socialista permitiu que a cruz dos caídos do monte do Castro, o maior símbolo do franquismo que permanece en Vigo, cumprise onte o seu 53 aniversario. A efemérides chegou en plena polémica pola decisión de Abel Caballero de recorrer a sentenza xudicial que ordena a derriba do monumento. Tivese bastado con acatar o fallo para non chegar a este aniversario, pero o rexedor non o quixo así. E a polémica non cesa.

Algúns internautas aproveitaron para rescatar o noticiero oficial da ditadura, o NON-DO, que deixa ben ás claras a historia da cruz e que pon en evidencia algunhas das escusas ás que se agarrou o rexedor vigués, para desgusto de moitos compañeiros de partido e case toda a esquerda.

 

O 14 de setembro de 1961, Francisco Franco chegou no Azor á ría e, a bordo dunha lancha, dirixiuse ao porto para inaugurar primeiro o edificio da Estación Marítima (que xa levaba medio ano funcionando) e logo a cruz dos caídos na saia do monte vigués. As imaxes do NON-DO mostran non só a adhesión inquebrantable do locutor, tan adoitado ao ensalzamiento da figura de «a súa excelencia», senón tamén a un grupo de cidadáns enfervorizados que aclaman ao xefe do Estado e que celebran o monumento levantado en recordo dos mortos no bando nacional durante a Guerra Civil. A comitiva non é menor e a Franco véselle moi tranquilo, sempre atendendo as explicacións dos mandatarios locais.

 

Do Castro foise a terreo da Zona Franca para visitar as instalacións de Citroën. E de alí, a unha fábrica de Pontevedra para máis tarde regresar ás Cíes en barco. Porque esa xornada foi proveitosa para quen querían adular ao xeneral. Inaugurouse tamén o monólito que servía como recoñecemento de toda a provincia de Pontevedra no 25 aniversario da vitoria. O cronista do noticiero conta como as tripulacións «aclaman» ao líder nese «colosal fito» que supón a «conmovida homenaxe», sen esquecer as «mostras de afecto dos pescadores».

 

O caso é que o monólito das Cíes xa é historia. O Goberno do PSOE encargouse de dinamitar aquel pegote de albanelería que permanecía en todo un parque nacional. Bastou con aplicar a Lei de Memoria Histórica sen que ninguén se rasgase as vestiduras. Caballero non quixo seguir o ronsel socialista e indultou a cruz, agarrándose a unha acordo plenario da época de Soto. Naquel momento fixéronse piruetas para proclamar que o momento debía recordar a todas as vítimas.

 

A postura do alcalde segue provocando indignación. Entre os republicanos, sen dúbida. A plataforma Nova Esquerda Galega-Federación de Republicanos asegurou onte que demandarán a Caballero ante a xustiza, xunto con outras organizacións políticas e sociais, polo delito de prevaricación «non caso de que siga incumprindo coa Lei de Memoria Histórica.

 

Este colectivo, que ten como portavoz a Lois Pérez Leira, advertiu que existen outros monumentos e símbolos fascistas na cidade que deberían ser incluídos nun programa de «limpeza democrática». Mencionan, entre eles, o monumento funerario en homenaxe ao capitán Antonio Carreró e o escudo da Comandancia. Igualmente, piden que se cambien os nomes de rúas como Luis Suárez-Llanos , Rafael Portanet e Eijo Garay.

 

Crónica, o non-do recolle a inauguración no castro en setembro de 1961